قلتم علي باع الحدود للمغتصب
وانتم خلستم للبلد سروالها
#سلام_الله_على_عفاش
اين جا ابو دقنه وذي حف الشنب
من قال ياشعب اليمن لك مالها
ذي قال بايكسي الوطن حُلَه ذهب
وارض اليمن باتستقر احوالها
وباتزرعوا الصحراء من اثمار العنب
وكل السلع باترخصون اسعارها
وباترجعون النفط ذي كان انتهب
واسماك تغنينا مع مرجانها
قلتم لنا ثوره ونرجع ما استلب
يرحل علي صالح.، بيصْلِح حالها
هذا علي صالح ذَهبْ.، وين الذهَبْ؟
اربع سنين والشمس اين انوارها؟
اين الخطابات.. والخطيب اللي اختطب
الناس كل لحظة تسوء احوالها
اين جاء ابو دقنه تعال اسمع عَتَبْ
مال اليمن ، محد بيسأل مالها !
وين السلع والرخص يالوم الشنب!
وين الصحاري ذي انتجت اثمارها
والامن يا اخوان مايوم إسْتَتَبْ
وضباطنا من هو الذي يغتالها
وغازنا والنفط انبوبه اَنضَرَب
قدهو مرقع حالته يرثى لها
والبرج في مارب تخلبط واندرب
بادت سباء لكن بقي عكبارها
ويابن سميع الكذب قد ملا القِرَبْ
وصوت المواطير قد صدح قرقارها
وابن الوجيه اليوم كالحيه اقتلب
قد صار للجرعه يدق اطبالها
يشتي يجرعنا جرع حسب الطلب
جرعه تموتنا ومانصحى لها
ماهمكم غير المناصب والرتب
وارض اليمن تفنى ويلعن عارها
قلتم علي باع الحدود للمغتصب
وانتم خلستم للبلد سروالها
محد يحط الذيب حارس للكَسَب
ولا يحط اللص يحمي مالها
خلو علي محسن كعبد المطلب
وصادق الاحمر اسد ثوارها
جابوا حمار اعرج ومهزوز الرُكب*
حتى يشل احمالنا وماشالها
وان الحمار زد جا طلع فوق الحطب
فوق المواطن ..، طفحوا شلالها
باسندوه ارحل كما زاد التعب
رح لك خزيمه وانتظر بأبوابها
محد يحط الزيت لافوق الخشب
ماهو بصب الزيت نِطْفِي نارها
يا كاتِب التاريخ دَوِّن و أنْتَحب
ماشلت الثوره بوسط ارحامها
كيف انجبت خنزير في جلده جَرَب
وكيف اَنْكَحوه حسناء بتول ابكارها
وكيف إن الشعب ساكت مُغتَلِب
وكيف اسقته هذي الحكومه أبوالها
تَبَّتْ حكومتكم حكومة بولهب
ماقد فعل فرعون مثل افعالها
ياربنا ندعوك قد زاد اللَغَّب
خذ لليمن من الحكومه ثارها
وحرق الخاين وسط نار اللهب
وارض اليمن يارب تصلح حالها
وكل سارق تِسْلِبَه ما قد كَسَب
وعصابة الابراج خذ ابصارها
والختم صلى الله على سيدالعرب
ماامطرت غيمات وعادت دارها
ومانَبت من ارضنا مثمر وحَبْ
و عَدّ نجمات السماء واقمارها....
تعليقات
إرسال تعليق